410.மனகபாடம்

410

பொது

       தனன தான தானான தனன தான தானான

          தனன தான தானான               தனதான

மனக பாட பாடீர தனத ராத ராரூப

   மதன ராச ராசீப                                   சரகோப

வருண பாத காலோக தருண சோபி தாகார

   மகளி ரோடு சீராடி                              யிதமாடிக்

குனகு வேனை நாணாது தனகு வேனை வீணான

   குறைய னேனை நாயேனை      வினையேனைக்

கொடிய னேனை யோதாத குதலை யேனை நாடாத

   குருட னேனை நீயாள்வ                  தொருநாளே

அநக வாம னாகார முநிவ ராக மால்தேட

   அரிய தாதை தானேவ                        மதுரேசன்

அரிய சார தாபீட மதனி லேறி யீடேற

   அகில நாலு மாராயு                     மிளையோனே

கனக பாவ னாகார பவள கோம ளாகார

   கலப சாம ளாகார                             மயிலேறுங்

கடவு ளேக்ரு பாகார கமல வேத னாகார

  கருணை மேரு வேதேவர்                   பெருமாளே

பதம் பிரித்து உரை

மன கபாடம் பாடீர தனம் தராதரம் ரூப

மதன ராச ராசீப சரம் கோப

மன கபாடம் - கபடம் கொண்ட மனத்தையும் பாடீரம் - சந்தனம் அணிந்துள்ள தனம் - கொங்கையாகிய. தராதரம் - மலையையும் (கொண்ட) ரூப - உருவத்தை உடையவரும்  மதன ராசர் -  மன்மத ராஜன் (செலுத்தும்) ராசீப சரம் - தாமரைப் பாணத்தின் கோப - கோபத்துக்கு இலக்காய் (இருப்பதால்).

வருண பாதகம் அலோகம் தருண சோபிதம் ஆகாரம்

மகளிரோடு சீராடி இதம் ஆடி

வருண பாதகம் - குல வேற்றுமையால் வரும் பாவம் அலோகம் - (தம்) கண்ணுக்குப்  புலப்படாதவரும் தருண - இளமை. சோபித - அழகு வாய்ந்த ஆகாரம் - உடம்போடு கூடியவருமான மகளிரோடு - மாதர்களுடன் சீராடி - செல்வச் செருக்குடன் விளையாடியும் இதமாடி - இன்பம் திளைத்தும்

குனகுவேனை நாணாது தனகுவேனை வீணான

குறையனேனை நாயேனை வினையேனை

குனகுவேனை - கொஞ்சிக் காலம் கழிப்பவனும். நாணாது - கூச்சமில்லாமல். தனகுவேனை - சரசம் செய்பவனும். வீணான - வீண் காலம் போக்கும். குறையனேனை - குறையை உடையவனும். நாயேனை - நாயைப் போன்றவனும். வினையேனை - வினைக்கு ஈடானவனும்.

கொடியனேனை ஓதாத குதலையேனை நாடாத

குருடனேனை நீ ஆள்வது ஒரு நாளே

கொடியனேனை - பொல்லாதவனும் ஓதாத - (உன்னைப் போற்றித்) துதிக்காத. குதலையேனை - கொச்சைப் பேச்சு உடையவனும் நாடாத - (உன்னை)  விரும்பித் தேடாத குருடனேனை - குருடனுமாகிய என்னை நீ ஆள்வது ஒரு நாளே - நீ ஆண்டருளுவதும் ஒரு நாள் ஆகுமோ?

அநக வாமன ஆகாரம் முநிவர் ஆகம் மால் தேட

அரிய தாதை தான் ஏவ மதுரேசன்

அநக - பாபமற்றவனே  வாமன ஆகார - குறள் வடிவம் கொண்ட முநிவராக - தவ முனிவரின் உருவத்தை (மாவலிக்காக எடுத்த) மால் தேட - திருமாலும் தேட அரிய - (அவருக்கு) எட்டாதவராய் நின்ற தாதை - (உன்) தந்தையாகிய மதுரேசன் தான் ஏவ - மதுரைச் சொக்க நாதர் அனுப்ப

அரிய சாரதா பீடம் அதனில் ஏறி ஈடேற

அகில நாலும் ஆராயும் இளையோனே

அரிய - அருமை வாய்ந்த. சாரதா பீடம் அதனில் ஏறி - சரஸ்வதியின் இருப்பிடமான சங்கப் பலகையில் ஏறி. ஈடேற - உலகத்தார் உய்ய. அகில நாலும் - நாற்றிசையில் உள்ள உயிர்களை எல்லாம். ஆராயும் இளையோனே - ஆய்ந்து புரக்கும் இளையோனே.

கனக  பாவன ஆகார பவள கோமள ஆகார

கலப சாமள ஆகர மயில் ஏறும்

கனக - பொன் போன்ற பாவன ஆகார - தூய மேனியனே பவள - பவளம் போன்ற கோமள ஆகார - அழகிய மேனியனே கலப - தோகை உடையதும் சாமள ஆகார - பச்சை நிறம் கொண்டதுமான உடலைக் கொண்ட மயில் ஏறும் - மயிலின் மேல் ஏறும்

கடவுளே க்ருப ஆகார கமல வேதன ஆகார

கருணை மேருவே தேவர் பெருமாளே.

கடவுளே - கடவுளே க்ருப ஆகார - கருணை உருவத்தனே கமல - இதய கமலத்தில் பொருந்திய வேதன ஆகார - ஞான சொருபனே கருணை மேருவே - கருணைப் பெரு மலையே தேவர் பெருமாளே - தேவர் பெருமாளே.

சுருக்க உரை

கபடமான மனத்தையும், சந்தனம் அணிந்த கொங்கையாகிய மலையையும் கொண்ட உருவத்தை உடையவர்களும், மன்மதனுடைய தாமரைப் பாணத்தின் கோபத்துக்கு இலக்காய் இருப்பதால், குல வேற்றுமையே இல்லாதவரும், இளமையும், அழகும் வாய்ந்தவருமாகிய விலை மாதர்களுடன் விளையாடியும், இன்பம் திளைத்தும், காலம் கழிப்பவனும், வெட்கமின்றி காம லீலைகளில் ஈடுபடும் குறையை உடையவனும்,  வினைக்கு ஈடானவனும், பொல்லாதவனுமாகிய நான் உன்னைப் போற்றித் துதிக்காதவன். உன்னை விரும்பித் தேடாத குருடன். இத்தகைய  இழியோனாகிய என்னை நீ ஆண்டருளும் நாள் ஒன்று உண்டோ?

பாபமற்றவன், குறள் வடிவம் எடுத்தவன் ஆகிய திருமாலுக்குத் தேட அரியாதவராகிய உன் தந்தையாகிய சிவபெருமான் அனுப்பச் சங்கப் பலகையில் வீற்றிருந்தவனே, உலகத்தோர் உய்ய நாலு திசைகளில் உள்ள உயிர்களை ஆராய்ந்து புரக்கும் இளையோனே, தூயவனே, சிவந்த மேனியனே, மயில் மேல் ஏறும் கடவுளே, கருணை மேருவே, என்னை ஆண்டருளுவதும் ஒரு நாளே?

ஒப்புக:

வாமனாகார முநிவராக மால் தேட...

மாபலியைச் சிறை வைத்தவன்  ...  திருப்புகழ் எலுப்புநாடி.

குறியவன் செப்பப்பட்ட எவர்க்கும் பெரியவன்                                                              ...       திருப்புகழ் செறிதரும்

மால் தேட அரிய தாதை தான் ஏவ....

திருமால் கமலப் பிரமா விழியிற்

றெரியா வரனுக்   கரியோனே....திருப்புகழ், அருமாமதனை.

விளக்கக் குறிப்புகள்

சாரதா பீட மதனி லேறி ஈடேறி....

சாரதா பீடம் என்றால் 'சரஸ்வதியின் இருக்கை' அதாவது அன்னை நித்யவாஸம் செய்யும் இடம் என்று பொருள்.

சாரதா பீடம் - சங்கப் பலகை. சங்கப் புலவர்களுக்குள் ஏற்பட்ட கலக்கத்தை சிவபெருமான் திருவுளப்படி முருகவேள் சங்கப் பல¨கையில் அமர்ந்து தீர்த்து வைத்தார்.

ஒப்புக :  ஏழேழு பேர்கள் கூற வருபொரு ளதிகாரம்  ..  .திருப்புகழ் சீரானகோல.

409.மதிதனை

409

பொது

        தனதன தனான தான தனதன தனான தான

         தனதன தனான தான              தனதான

மதிதனை இலாத பாவி குருநெறி யிலாத கோபி

   மனநிலை நிலாத பேயர்                    அவமாயை

வகையது விடாத பேடி தவநினை விலாத மோடி

   வரும்வகை யிதேது காய                  மெனநாடும்

விதியிலி பொலாத லோபி சபைதனில் வராத கோழை

   வினையிகல் விடாத கூள                னெனைநீயும்

மிகுபர மதான ஞான நெறிதனை விசார மாக

   மிகுமுன துரூப தான                    மருள்வாயே

எதிர்வரு முதார சூர னிருபிள வதாக வேலை

   யியலொடு கடாவு தீர                      குமரேசா

இனியசொல் மறாத சீலர் கருவிழி வராமல் நாளும்

   இளமைய துதானு மாக                 நினைவோனே

நதியுட னராவு பூணு பரமர்கு ருநாத னான

   நடைபெறு கடூர மான                     மயில்வீரா

நகைமுக விநோத ஞான குறமினு டனேகு லாவு

   நவமணி யுலாவு மார்ப                   பெருமாளே.

பதம் பிரித்து  உரை

மதி தனை இலாத பாவி குரு நெறி இலாத கோபி

மன நிலை நிலாத பேயன் அவம் மாயை

மதி தனை இலாத பாவி - அறிவு இல்லாத பாவி. குரு நெறி இலாத கோபி - குரு போதித்த நெறியில் நிற்காத சினம் உள்ளவன் மன நிலை நிலாத பேயன் - மனம் ஒரு நிலையில் நிற்காத பேய் போன்றவன் அவம் மாயை - பயனற்ற பொய்யான.

வகை அது விடாத பேடி தவ நினை இலாத மோடி

வரும் வகை இது ஏது காயம் என நாடும்

வகை அது விடாத - போக்குகளை விடாத. பேடி - ஆண்மை அற்றவன். தவ நினைவு இல்லாத மோடி - தவம் என்னும் நினைப்பே இல்லாத (வனக்) முரடன் காயம் வரும் வகை இது ஏது - இந்த உடலில் பிறப்பு வந்தது எப்படி என நாடும் - என்று ஆராயும்.

விதி இலி பொல்லாத லோபி சபை தனில் வராத கோழை

வினை இகல் விடாத கூளன் எனை நீயும்

விதி இலி - பாக்கியம் இல்லாத பொலாத லோபி - பொல்லாத குறையை உடையவன் சபை தனில் வராத கோழை - சபைகளில் வந்து பேசும் மனத் திடம் இல்லாத கோழை வினை இகல் விடாதா - வினையின் வலிமையை விடாத கூளன் எனை - பயனிலி ஆகிய என்னை நீயும் - நீயும்.

மிகு பரமதான ஞான நெறி தனை விசாரமாக

மிகும் உனது ரூப தானம் அருள்வாயே

மிகு பரமதான - மிக மேலான ஞான நெறி தனை - ஞான மார்க்கத்தை விசாரமாக - ஆராய்ச்சி செய்ய மிகும் - மிக்கு விளங்கும் உனது ரூப தானம் - உன்னுடைய உருவமான பரிசை. அருள்வாயே - அருள்வாயாக.

எதிர் வரும் உதார சூரன் இரு பிளவதாக்க வேலை

இயலோடு கடாவு தீர குமரேசா

எதிர் வரும் - எதிர்த்து வந்த உதார சூரன் - மேம்பாடு உடைய சூரன். இரு பிளவதாக - இரண்டு பிளவாகும்படி வேலை - வேலாயுதத்தை இகலொடு - தகுதியுடன் கடாவு - செலுத்திய குமரேசா - குமரேசனே.

இனிய சொல் மறாத சீலர் கரு விழி வராமல் நாளும்

இளமை அது தானும் ஆக நினைவோனே

இனிய சொல் மறாத - இனிமை வாய்ந்த சொற்கள் இல்லை என்னாத சீலர் - சுத்த ஆன்மாக்கள் கரு வழி வராமல் - மீண்டும் பிறவாமல் நாளும் - எப்போதும் இளமை அது தானும் ஆக - இளமையோடு விளங்க நினைவோனே - நினைத்து அருள்பவனே

நதியுடன் அராவு பூணு பரமர் குரு நாதனான

நடை பெறு கடூரமான மயில் வீரா

நதியுடன் - கங்கை ஆற்றுடன் அராவு  பூணும் - பாம்பையும் அணிந்துள்ள பரமர் - சிவபெருமானின் குரு நாதன் ஆன - குரு மூர்த்தியான (மயில் வீரனே) நடை பெறு - நடையில் கடூரமான - வேகம் வாய்ந்ததான மயில் வீரா - மயில் வீரனே.

நகை முக விநோத ஞான குற மின்னுடனே குலாவு

நவ மணி உலாவு மார்ப பெருமாளே.

நகை முக - சிரித்த முகம் உடையவளும். விநோத - அழகிய ஞான குற மின்னுடனே - அற்புதமான ஞானத்தைக் கொண்டவளும் ஆகிய குறப் பெண் வள்ளியுடன் குலாவும் - கொஞ்சுகின்ற (பெருமாளே) நவமணி உலாவு - நவரத்தின மாலை விளங்குகின்ற மார்ப பெருமாளே - மார்பை உடைய பெருமாளே.

சுருக்க உரை

அறிவு இல்லாத பாவி, குரு சொன்ன நெறியில் நில்லாதவன், சினம் உள்ளவன்,. மனம் ஒரு நிலையில் நிற்காதவன், பயனற்றவன், பொய்யான போக்குகளை விடாத முரடன். தவம் என்ற நினைப்பே இல்லாதாவன். இப்பிறப்பு எப்படி வந்தது என்பதை ஆயும் பாக்கியம் இல்லாதவன் ,சபைகளில் பேசும் மன வலிமை இல்லாதவன். இத்தகைய நானும் மேலான ஞான மார்க்கத்தை விசாரமாக ஆராய்ச்சி செய்ய, உன்னுடைய சாரூபம் என்னும் பரிசை எனக்கு அருள் புரிவாயாக.

சூரனுடைய உடல் இரண்டு பிளவாகும்படி வேலை எய்தியவனே குமரேசனே. இனிமை வாய்ந்த சொற்கள் நான் எப்போதும் பேசும்படியும், பரிசுத்தமானவர்கள் போல நானும் மீண்டும் பிறவாமல் இருக்கவும், என்றும் இளமையோடு வாழவும் நினைத்து அருள வேண்டும். கங்கை, பாம்பு இவற்றை அணிந்த சிவபெருமானுக்குக் குருவானவனே, மயில் வீரனே, சிரித்த முகத்தை உடைய வள்ளி நாயகியுடன் கொஞ்சும் பெருமாளே, நவ இரத்தின மாலை அணிந்த மார்பை உடைய பெருமாளே, உனது உருவத்தைக் காட்டி அருளுக.

ஒப்புக:

சபைதனில் வராத கோழை...

   கல்லா தவரின் கடைடென்ப கற்றறிந்தும்

    நல்லார் அவைஅஞ்சு வார்...திருக்குறள்

விளக்க குறிப்புகள்

உனது ரூப தானம் அருள்வாயே...

 இறைவனோடு ஜீவாத்மா கலப்பதை மூன்று நிலைகளில் கூறலாம்.

   1. சாமீபம் - ஜீவன் பரமாத்மாவை நெருங்கி இருக்கும் நிலை.

   2. சாயுச்சியம் - இறைவனோடு இரண்டற ஐக்கியமாகும் மோட்ச நிலை.

   3. சாரூபம் - இறைவன் உருவம் பெற்று விளங்கும் நிலை.

    அருணகிரி நாதர் இவற்றுள் சாரூப பதவியை வேண்டுகிறார்.  சாரூப     பதவி    சன்மார்க்கத்தால் கை கூடுவது.

உனை உணர்ந்து ஒரு மவுன பஞ்சரம் பயில் தரும் சுக

பதம் அடைந்திருந்து அருள் பொருந்தும் அது ஒரு    நாளே            ... திருப்புகழ் கடைசிவந்தகன்

  

இருவோர் ஒரு ரூபமதாய்... இறையோனிடமாய் விளையாடுகவே இயல்வே லுடன் மா அருள்வாயே

                   ...... திருப்புகழ், சிவமாதுடனே

  

 சுக சொரூபத்தை உற்று அடைவேனோ .

                     ..... திருப்புகழ், சரியையாள

    பாடல் 369 குறிப்பை பார்க்கவும்

   முதல் நான்கு அடிகளில் அடிகளார் தம் குறைகள் எடுத்துக் கூறியுள்ளார். இதே    போல் அவகுணவிரகனை எனத் தொடங்கும் திருப்புகழ்ப் பாடலிலும்  

    குறைகள்     கூறப்பட்டுள்ளன.