402.பூதகலாதிகள்

402

பொது

        தானன தானன தந்த தானன தானன தந்த

        தானன தானன தந்த                தனதான

பூதக லாதிகள் கொண்டு யோகமு மாகம கிழ்ந்து

   பூசைகள் யாதுநி கழ்ந்து                பிழைகோடி

போம்வழி யேதுதெ ரிந்து ஆதிய நாதியி ரண்டு

   பூரணி காரணி விந்து                   வெளியான

நாதப ராபர மென்ற யோகியு லாசம றிந்து

   ஞானசு வாச முணர்ந்து               வொளிகாண

நாடியொ ராயிரம் வந்த தாமரை மீதில மர்ந்த

   நாயகர் பாதமி ரண்டு                 மடைவேனோ

மாதுசர் வேஸ்வரி வஞ்சி காளிபி டாரிவி பஞ்சி

  வாணிவ ராகிம டந்தை                    யபிராமி

வாழ்சிவ காம சவுந்த்ரி யால்மெ லாமுக பஞ்சி

   வாலைபு ராரியி டந்த                  குமையாயி

வேதபு ராணம்வி ளம்பி நீலமு ராரியர் தங்கை

   மேலொடு கீழுல கங்கள்               தருபேதை

வேடமெ லாமுக சங்க பாடலொ டாடல்ப யின்ற

   வேணியர் நாயகி தந்த                பெருமாளே.

பதம் பிரித்து உரை

பூத கலாதிகள் கொண்டு யோகமும் ஆக மகிழ்ந்து

பூசைகள் யாது நிகழ்ந்து பிழை கோடி

பூத - ஐம்பூதங்களின் சம்பந்தமான. கலாதிகள் கொண்டு -  சாத்திரங்கள் முதலானவைகளை ஆய்ந்தறிந்து.  யோகமுமாக மகிழ்ந்து - யோகவகை கூடிட மகிழ்ந்து.  பூசைகள் யாதும் - பூசைகள் யாவற்றையும். நிகழ்ந்து -  செய்து. பிழை கோடி - கோடிக் கணக்கான பிழைகள்.

போம் வழி ஏது தெரிந்து ஆதி  அநாதி இரண்டு

பூரணி காரணி விந்து வெளியான

போம் வழி - நீங்கும்படியான வழி. ஏது தெரிந்து - இன்னதென்று காரணம் உணர்ந்து. அதி அநாதி இரண்டு -  முதலும், முதலற்றதுமாய் உள்ள இரண்டுமாய் நிற்கின்ற.

பூரணி - முழு முதல்வி. காரணி - சகலத்துக்கும் மூல  காரணமாக இருப்பவளாகிய பரா சத்தியும்.  விந்து  வெளியான நாதம் - விந்து வெளியான நாதம்.

நாத பராபரம் என்ற யோகி உ(ல்)லாசம் அறிந்து

ஞான சுவாசம் உணர்ந்து ஒளி காண

பராபரம் என்ற - (விந்து சம்பந்தமான நாத ஒலி கூடி  முழங்கும் இடத்தில்) பரம் பொருளாகக் காட்சி தர. யோகி  - யோகிகள். உல்லாசம் அறிந்து - (காணும்) அந்த  பரமானந்த ஒளியை அறிந்து அனுபவித்து. ஞான சுவாசம்  உணர்ந்து - ஞான மூச்சியால் ஞான யோக நிலையை  அறிந்து ஒளி காண - நாத நல்லொளி தோன்ற

நாடி ஒரு ஆயிரம் வந்த தாமரை மீதில் அமர்ந்த

நாயகர் பாதம் இரண்டும் அடைவேனோ

நாடி - அதை விரும்பி. ஓராயிரம் வந்த தாமரை மீதில் - ஒரு ஆயிரம் இதழோடு கூடிய குரு கமலத்தின் மீது.  அமர்ந்த - உள்ள. நாயகர் - பெருமானது. பாதம் இரண்டும்  அடைவேனோ - இரண்டு திருவடிகளை அடைவேனோ?

மாது சர்வேஸ்வரி வஞ்சி காளி பிடாரி விபஞ்சி

வாணி வராகி மடந்தை அபிராமி

மாது - மாது. சர்வேஸ்வரி - எல்லாவற்றுக்கும் ஈசுவரி.  வஞ்சி - வஞ்சிக் கொடி போன்றவள். காளி - காளி. பிடாரி  - பிடாரி. விபஞ்சி - விபஞ்சி என்னும் வீணையை  ஏந்தியவள். வாணி - சரசுவதி. வராகி - சக்தி. மடந்தை -  மாது. அபிராமி - அழகி.

வாழ் சிவகாம சவுந்தரி ஆலம் மேலாம் பஞ்ச முக

வாலை புராரி இடம் தகு உமை ஆயி

வாழ் - வாழ்வு பொலியும். சிவகாம சவுந்தரி – சிவகாம  சௌந்தரி. ஆலம் மேலாம் - பிரளய கால வெள்ளத்தின்  மேலாகிய. பஞ்ச முக் வாலை - ஐந்து முகம் கொண்ட  பாலாம்பிகை. புராரி - திரி புரத்தை எரித்த சிவனது .  இடம் தகு உமை - இடது பாகத்துக்குத் தக்க உமா தேவி.  ஆயி - (எமது) தாய்.

வேத புராணம் விளம்பி நீல முராரியர் தங்கை

மேலொடு கீழ் உலகங்கள் தரு(ம்) பேதை

வேத புராணம் விளம்பி - வேதங்களையும்,    புராணங்களையும் சொன்னவள் நீல முராரியர் – முரன் என்னும் அசுரனுக்குப் பகைவனாகிய திருமாலின் தங்கை

- தங்கை  மேலோடு கீழ் உலகங்கள் - பதினான்கு

உலகங்களையும். தரும் பேதை - அளித்த மாது

வேடம் எ(ல்)லாம் உக சங்க பாடலொடு ஆடல் பயின்ற

வேணியர் நாயகி தந்த பெருமாளே.

வேடம் எல்லாம் - (ஆடலுக்கு உரிய) வேஷங்களெல்லாம்  உக - நிலை கலங்க. சங்க பாடலோடு –  சபையில்  பாடல்களும். ஆடல் பயின்ற - ஆடல்களும் பயின்ற  வேணியர் - சடையை உடைய சிவ பெருமான் நாயகி - தேவி (ஆகிய பார்வதி) தந்த பெருமாளே – பெற்ற பெருமாளே.

சுருக்க உரை

ஐம்பூதங்கள் சம்பந்தப்பட்ட சாத்திரங்கள் முதலியவற்றை ஆய்ந்து அறிந்து, யோக வகை கூடிட மகிழ்ந்து, பூசைகளெல்லாம் செய்து, என் பிழைகள் நீங்க வழி இன்னதென்று உணர்ந்து, முதலும் அந்தமும் இல்லாததாய் நிற்கும் பூரணி, எல்லாவற்றுக்கும் காரணப் பொருளாக இருக்கும் பராசக்தி, விந்து சம்பந்தமான் நாத ஒலி கூடி முழங்கும் இடத்தில் பரம் பொருளாகக் காட்சி தர, ஒரு ஆயிரம் இதழோடு கூடிய குரு கமலத்தின் மீதுள்ள பெருமானது இரண்டு திருவடிகளை அடைவேனோ?

சர்வேஸ்வரி, காளி, பிடாரி, விபஞ்சி, அபிராமி, சிவகாம சுந்தரி, பாலாம்பிகை, திரு புரம் அழித்த சிவ பெருமானது இடப் பாகத்தில் இருக்கத் தகுதியானள், உமை, தாய், எல்லா உலகங்களையும் பெற்ற மாது, ஆடலும், பாடலும் பயின்ற சடைப் பெருமானது தேவி, இத்தகைய பார்வதி பெற்ற பெருமாளே, உன் பாதங்களை அடைவேனோ?

ஒப்புக

ஆதி அநாதி இரண்டு பூரணி ....

ஆதி அனாதி ஆய பராசக்தி

பாதி பராபரை மேலுறை பைந்தொடி                     ....திருமந்திரம்

ஞான சுவாசம் உணர்ந்து நாடி....

ஞானத்தில் யோகமே நாதாந்த நல் ஒளி

ஞானக் கிரியையே நன்முத்தி நாடலே                   ....திருமந்திரம்

விளக்கக் குறிப்புகள்

விபஞ்சி - தேவி கையில் இருக்கும் வீணை.

ஆலமேலாம் - பிரளய கால வெள்ளத்தின் மேலாகிய.

ஆயிரம் வந்த தாமரை மீதில்...

ஆறு ஆதாரங்களோடு சஹஸ்ராரம் என்பது ஆக்ஞேய சக்கரத்துக்கு மேலே, தலையில் பிரம்ம கபாலத்தில், ஆயிரம் இதழ் கமலமுள்ள பிந்து ஸ்தானமாக கிய பாவனைக்கு உரியது என்பர்

ஒப்புக

   நூறு பத்தினுட நெட்டுஇத

  ழாகி யேழுமள விட்டருண விற்பதியின் விந்துநாத...  .

                                                                திருப்புகழ்,ஆசைநாலுசது

 

 மேலைவெளி யாயி ரத்து நாலிருப ராப ரத்தின்

 மேவியரு ணாச லத்தி னுடன்மூழ்கி...திருப்புகழ், சூலமெனவோடு.

இடந்தகுமை - இடம் தகு உமை.

397. பாணிக்குட் படாது

397

பொது

   தானத்தத் தனான தானன தானத்தத் தனான தானன

   தானத்தத் தனான தானன             தந்ததான

பாணிக்குட் படாது சாதகர் காணச்சற் றொணாது வாதிகள்

   பாஷிக்கப் தகாது பாதக                                              பஞ்சபூத

பாசத்திற் படாது வேறொரு பாயத்திற் புகாது பாவனை

   பவிக்கப் பெறாது வாதனை                                  நெஞ்சமான

ஏணிக்கெட் டொணாது மீதுயர் சேணுக்குச் சமான நூல்வழி

   யேறிப்பற் றொணாது நாடினர்                            தங்களாலும்

ஏதுச்செப் பொணாத தோர்பொருள் சேரத்துக் கமாம கோததி

   யேறச்செச் சைநாறு தாளைவ                         ணங்குவேனோ

ஆணிப்பொற் ப்ரதாப் மேருவை வேலிட்டுக் கடாவி வாசவன்

   ஆபத்தைக் கெடாநி சாசுரர்                                    தம்ப்ரகாசம்

ஆழிச்சத் ரசாயை நீழலி லாதித்தப் ப்ரகாச நேர்தர

   ஆழிச்சக் ரவாள மாள்தரும்                                    எம்பிரானே

மாணிக்க ப்ரவாள நீலம தாணிப்பொற் கிராதை நூபுர

   வாசப்பத் மபாத சேகர                                             சம்புவேதா

வாசிக்கப் படாத வாசகம் ஈசர்க்குச் சுவாமி யாய்முதல்

   வாசிப்பித் ததேசி காசுரர்                        தம்பிரானே

பதம் பிரித்து  உரை

பாணிக்கு உட்படாது சாதகர் காண சற்று ஒணாது வாதிகள் பாஷிக்க தகாது பாதக பஞ்ச பூத

பாணிக்கு உட்படாது - கையில் அகப்படாதது சாதகர் – யோக வழியில் நிற்பவர்களால் காணச் சற்று ஒணாது -  சற்றும் காண முடியாதது வாதிகள் - தருக்க வாதிகளால். பாஷிக்கத் தகாது - பேசி முடிவு காண முடியாதது பாதக -

பாவங்களுக்கு இடம் தரும்.  பஞ்ச பூத - ஐந்து பூதங்களால்.

[ பாணிக்கு  உட் படாது - கரங்களால் தொட்டுப் பிடிக்க முடியாததும் (அறிவும் அறியாமையும் கடந்த அறிவே ஒரு திரு மேனியாக கொண்ட பரம் பொருளை அருள் அறிவினாலேயே மட்டுமே அறிய முடியும் . ஐந்து புலன்களின் வழியாகக் காண முடியாது )

சாதகர் காணச் சற்றொணாது  - யோக சாதனை மூலமாகவும் சிறிதும் பார்க்க முடியாதது ( முகத்தில் கண் கொண்கின்ற மூடர்காள் அகத்தில் கண் கொண்டு காண்பதே ஆனந்தம் . எல்லாப் பற்றுக் களையும் அறவே நீக்கிய சிவயோகிகளே பரம் பொருளை அறிவார்கள். வானத்தில் மண்ணில் பெண்ணில்  மைந்தரில் பொருளில்

‘ஆசை தான் அற்று  தம்மில் நீத்து தத்துவம் உணர்ந்த யோகர் ஞானக் கண் கொண்டு அன்று நடந்த ஜோதி’ - திருவிளையாடல் புராணம்)

வாதிகள்  பாஷிக்கத் தகாது - சமய  தர்க்கங்களால் பேசி முடிவு காண எட்டாதது ( திறம் என்று தத்தம் மதத்தையே தாபித்து செய்கை கொடு  முறை அறிவார் ஆறு சமயங்கள் தோறும் வேறு வேறாகி விளையாடும் உமை யாவர் அறிவாரே ]

பாசத்தில் படாது வேறு ஒரு உபாயத்தில் புகாது பாவனை பாவிக்க பெறாது வாதனை நெஞ்சமான

பாசத்தில் படாது - பாசங்களிலும் தளைகளிலும் அகப்படாதது வேறு உபாயத்தில் புகாது - வேறு எந்தவிதமான உபாயத்திலும் மாட்டிக் கொள்ளாதது பாவனை – எவ்வித தியான வகையாலும் பாவிக்கப் பெறாது – தியானிக்க முடியாதது வாதனை - வருத்தங்களுக்கு இடமான நெஞ்சமான - மனம் என்கின்ற

[பாதக பஞ்ச பூத பாசத்தில் படாது - ஆன்மீக முன்னேற்றத்திற்கு தடையாய் நிற்கும் ஆசைகளுக்கு காரணமான ஐம்பூதங்களின் தளையில் அகப்படாதது ( இந்தடையைக் கடக்க அருணகிரியார் ஓர் உபாயம் தெரிவிக்கிறார். ஐந்து பூதங்களும் இறைவனின் பரிணாம வடிவங்களே என்று உபாசனை செய்ய வேண்டும். ஐந்து புதமும்  -  ஏக வடிவம் - விராலிமலைத் திருப்புகழ்)

வேறொரு உபாயத்தில் புகாது  - வேறு எந்தத் தந்திரத்திலும் சிக்கிக் கொள்ளாதது.

பாவனை பாவிக்கப் பெறாது - மனதால் தியானித்து பாவிக்க முடியாதது ( மனம் லயம் அடைந்த பிறகே மெய்யுணர்வு உதிக்கும், சமாதி  மனோலயம் இன்று தாராய்]

ஏணிக்கு எட்டொணாது மீது உயர் சேணுக்கு சமான நூல்வழி ஏறி பற்ற ஒணாது நாடினர் தங்களாலும்

ஏணிக்கு எட்ட ஒணாது - ஏணி கொண்டு எட்ட முடியாதது.  மீது - மேலே. உயர் - உயரத்தில் உள்ள சேணுக்கு - ஆகாயத்துக்கு சமான - ஒப்பான கருத்துள்ள நூல் வழி -  கலை நூல்களின் வழியே ஏறிப் பற்ற ஒணாது- ஆய்ந்து ஏறிக் கொண்டு பிடிக்க முடியதது நாடினர் தங்களாலும் - தேடி  முயல்பவர்களாலும்.

[வாதனை நெஞ்சமான ஏணிக்கு எட்டொணாது - உள்ளத்தில் சதா ஆசைகளும் அவைகள் நிறைப் வேறாததினால் ஏக்கமும் குடி கொண்ட நெஞ்சமான ஏணி கொண்டு இறைவனை அறிய முடியாது,

மீது உயர் சேணுக்குச் சமான நூல் வழி ஏறிப் பற்றொணாது - மிக உயர்ந்த ஆகாயத்திற்கு ஒப்பான உயர்ந்த கருத்துக்கள் அடங்கி உள்ள சாத்திரங்கள் மூலமாக ஆராய்ந்து ஏறி கண்டு பிடிக்க முடியாதது  ‘வேடக் காட்சிக்கும் உபநிடத்து உச்சியில் விரித்த போதக் காட்சிக்கும் காணலன்’ - கந்த புராணம், ‘நூல் அறிவிற்கு அப்பாற்பட்டவன் வாலறிவன்’ - திருக்குறள்] 

ஏது செப்ப ஒணாதது ஓர் பொருள் சேர துக்கமாம் மகா உததி ஏற செச்சை நாறு தாளை வணங்குவேனோ

ஏதுச் செப்ப ஒணாதது -  காரண மூலம் சொல்ல முடியாதது ஓர் பொருள் - இத்தகைய ஒரு பொருளை சேர - நான் அடைய. துக்கமாம் - துக்கம் என்னும் மகா உததி - பெரிய கடலினின்றும் ஏற - நான் கரை ஏற. செச்சை நாறு - நறுமணம் கமழும் தாளை - உனது திருவடிகளைவணங்குவேனோ - வணங்க மாட்டேனோ?

[நாடினர் தங்களாலும்  ஏதுச் செப்பொணாதது - அறிய வேண்டும் எனத் தேடுபவர்களாலும் காரணம் கற்பித்துக் கூற முடியாதது,  தேவரும் அறிகிலா இறைவனை புலவோர் இனிய பாடல்களால் ஏத்துவதைத் தவிர கண்டறியார் என்கிறார் மணிவாசகர். பூதங்கள்தோறும் நின்றாய் எனின் அல்லால் போக்கிலன் வரகிலன் நினைப் புலவோர் கீதங்கள் பாடுதல், ஆடுதல் அல்லால் கேட்டறியோம் உம்மைக் கண்டறிவாரை. பின் எப்படித்தான் அவனை அறிவது? அன்பினால் முடியும். பக்தி வலையில் படுவோன் காண்க. அப்படி பக்தி செலுத்தினேன், ப்ரத்யக்ஷமாக அவனைப் பார்த்தேன் என்கிறார். ‘கண்ணால் யானும் கண்டேன் காண்க’ -  திருவாசகம்)  

ஓர் பொருள் சேர - இப்பேர்ப்பட்ட ஒரு பொருளை நான் அடையவும்,

துக்க மா மகோ உததி  ஏற - பிறவித் துன்பம் எனும் மிகப் பெரிய கடலில் நின்று கரை ஏறவும்,

செச்சை நாறு தாளை வணங்குவேனோ - உன்னுடைய வெட்சி மலர் கமழும் திருவடிகளை வணங்க மாட்டேனா ?  ‘அறவாழி அந்தணன் தாள் சேர்ந்தார்க்கல்லால் பிறவாழி நீந்தல் அரிது ‘– திருக்குறள்]

ஆணி பொன் ப்ரதாப மேருவை வேல் இட்டு கடாவி வாசவன் ஆபத்தை கெடா நிசாசரர் தம் ப்ரகாசம்

ஆணி பொன் - உயர் மாற்றுப் பொன் மயமானதும் ப்ரதாப - பேர் பெற்றதுமான மேருவை - மேரு மலையை வேலிட்டு - வேலாயுதத்தை கடாவி - எடுத்துச் செலுத்தி வாசவன் - இந்திரனுடைய ஆபத்தை - ஆபத்தையும் கெடா - கெடுத்து. நிசாசரர் தம் - அசுரர்களுடைய ப்ரகாசம் - மேம்பாட்டையும் (கெடுத்து).

ஆழி சத்ர சாயை நீழலில் ஆதித்த ப்ரகாச நேர் தர

ஆழி சக்ரவாளம் ஆள் தரும் எம்பிரானே

ஆழி சத்ரசாயை நிழலில் - வட்டமான குடை தரும் பெருத்த நிழலில் ஆதித்த - சூரியனுடைய ப்ரகாச நேர் தர – ஒளிக்கு நிகரான விளங்கும்  ஆழிச் சக்ரவாளம் - கடலாலும் சக்ரவாள கிரியாலும் சூழப்பட்ட உலகை. ஆள் தரும் - ஆண்டருளும். எம்பிரானே - எம்பெருமானே.

மாணிக்க ப்ரவாள நீலம் மதாணி பொன் கிராதை நூபுர

வாச பத்ம பாத சேகர சம்பு வேதா

மாணிக்க(ம்) - செம்மணி. ப்ரவாளம் – பவளம்

நீலம் - நீலமணி மதாணி - (இவைகளால் ஆகிய) பதக்கத்தை அணிந்த கிராதை - வேடப் பெண்ணின் நூபுர - சிலம்பு அணிந்த வாச - நறு மணம் வீசும். பத்ம - தாமரை போன்ற. பாதசேகர - திருவடியைத் (தலை மீது) சூடியுள்ளவனே சம்பு  - திருமால் வேதா - பிரமன்.

வாசிக்க படாத வாசகம் ஈசர்க்கு சுவாமியாய்

வாசிப்பித்த தேசிகா சுரர் தம்பிரானே

வாசிக்கப் படாத - ஓதி அறியாத வாசகம் - திரு

வார்த்தையை ஈசர்க்கு - சிவ பெருமானுக்கு சுவாமியாய் -  குருவாய் முதல் - முன்பு. வாசிப்பித்த - உபதேசித்த. தேசிகா - குரு நாதரே சுரர் தம்பிரனே - தேவர்கள் தம்பிரானே.

[சம்பு வேதா வாசிக்கப் படாத வாசகம் ஈசர்க்குச் சுவாமியாய் -  திருமாலும் பிரம்மாவாலும் ஓதி உணரப்படாத திரு வார்த்தைகளை சிவ குருவாய், முதல் வாசிப்பித்த  தேசிகா,  சுரர்  தம்பிரானே -  முன்பு

உபதேசித்த ஆச்சார்யனே, தேவர்கள் தம்பிரானே]

   [  ] அடைப்புக்குள் கொடுக்கபட்டவை திரு நடராஜன் அவர்கள் தந்த

        விளக்கம்

சுருக்க உரை

சொல்லுக்கு அப்பாற்பட்டதும், யோக முறைகளால் காண முடியாததும், தர்க்க வாதிகளால் பேசி முடிவு காண முடியாததும், ஐம்பூதங்களால் ஏற்படும் தளைகளில் அகப்படாததும், வேறு உபாயத்திலும் மாட்டிக் கொள்ளாததும், தியான வகைகளால் பாவிக்க முடியாததும், மனதால் ஏணி கொண்டு எட்ட முடியாததும், நூல்களால் ஆய்ந்து அறிய முடியாததும், நாடுபவர்களாலும் காரண மூலம் சொல்ல முடியாததும், ஆகிய ஒரு பொருளை நான் அடையவும், என் துக்கம் என்னும் கடலினின்றும் நான் கரை ஏறவும், உன் திருவடிகளை வணங்க மாட்டேனோ?

கிரவுஞ்ச கிரியை வேலாயுதத்தால் அழித்து, இந்திரனுடைய ஆபத்தையும், அசுரர்களின் பெருமையை ஒழித்தும், எல்லா உலகங்களையும் ஆண்டருளும் பெருமாளே. பல வகையான மணிகளையும், சிலம்பையும் அணிந்த வேடர் பெண்ணாகிய வள்ளியின் பாதங்களை வணங்குபவனே, திருமாலும், பிரமனும் அறியாத பிரணவத்தைச் சிவ பெருமானுக்கு உபதேசித்தவனே, தேவர்கள் தம்பிரானே, உன் திருவடிகளை நான் வணங்க மாட்டேனோ?

விளக்கக் குறிப்புகள்

இப்பாடலில் மெய்ப்பொருள் தத்துவம் விளக்கப்பட்டுள்ளது.

 இதே கருத்து கூறப்பட்ட மற்ற திருப்புகழ்ப் பாடல்கள்   -

·        தொடர் வுணர அரிதாய தூரிய பொருளை- (சுருதிவெகு)

·        கதறிய் கலைகொடு சுட்டாத் தீர்பொருள். (கதறியகலை)

·        அபரிமித சுருதியும டங்குந்த னிப்பொருளை எப்பொருளுமாய்..    (அகரமுதலென)  

·        குருடர் தெரிவரிய தொரு பொருள் தெரிய நிகழ்மனது (குதறுமுனை)

·        சுருதியாய் சுருதிகளின் மேற்சுடராய். (பருதியாய்) சுருதியூடு கேளாது சரியையாளர் காணாது ... (சுருதியூடு)  

·        அறிவுமறி யாமையுங் கடந்த அறிவு திருமேனி யென்று.. (குகையில்).

ஓப்புக    பத்ம பாதக சேகர...  வேதா முதல் விண்ணவர் சூடு மலர்ப்    பாதா குறமின் பதசே கரனே....கந்தர் அனுபூதி