485. சுடரனைய

 

485

சிதம்பரம்

 

                தனதனன தனதான தனதனன தனதான

                    தனதனன தனதான                 தனதான

 

சுடரனைய திருமேனி யுடையழகு முதுஞான

     சொருப கிரி யிடமேவு                          முகமாறும்

சுரர்தெரிய லளிபாட மழலைகதி நறைபாய

     துகிரிதழின் மொழிவேத                        மணம்வீச

அடர்பவள வொளிபாய அரியபரி புரமாட

     அயில்கரமொ டெழில்தோகை                மயிலேறி

அடியனிரு வினைநீறு படஅமர ரிதுபூரை

     அதிசயமெ னருள்பாட                       வரவேணும்

விடைபரவி அயன்மாலொ டமரர்முநி கணமோட

     மிடறடைய விடம்வாரி                       யருள்நாதன்

மினலனைய இடைமாது இடமருவு குருநாதன்

      மிகமகிழ அநுபூதி                         யருள்வோனே

இடர்கலிகள் பிணியோட எனையுமருள் குறமாதி

     னிணையிளநிர் முலைமார்பி           னணைமார்பா

இனியமுது புலிபாத னுடனரவு சதகோடி

     யிருடியர்கள் புகழ்ஞான                  பெருமாளே

 

பதம் பிரித்து உரை

 

 

சுடர் அனைய திருமேனி உடை அழகு முது ஞான

சொருப கிரீடம் மேவும் முகம் ஆறும்

 

சுடர் அனைய திருமேனியுடை = (காலைக்) கதிர் போன்ற உடலின் அழகும் = அழகும் முது ஞான சொருப = முற்றின ஞானத்தின் திருவுருவமும்  கிரீடம் மேவும் = மகுடம் பொருந்திய முகம் ஆறும் = ஆறு முகங்களும்

 

சுரர் தெரியல் அளி பாட மழலை கதி நறை பாய

துகிர் இதழின் மொழி வேத மணம் வீச

 

சுரர் = தேவர்கள் (சூட்டிய) தெரியல் = மாலைகளிலிருக்கும் அளி பாட = வண்டுகள் பாட மழலைகதி = (அதனால் அம்மாலைகளிலிருந்து) மெதுவான வகையில் நறை பாய = துளித் துளியாகத் தேன் பாய துகிர் இதழின் = பவளம் போன்ற

வாயிதழிலிருந்து சொல்லப்படும் மொழி வேத = வேத மொழிகளின் மணம் வீச = நறு மணம் வீச

 

அடர் பவள ஒளி பாய அரிய பரிபுரம் ஆட

அயில் கரமொடு எழில் தோகை மயில் ஏறி

 

அடர் பவள ஒளி பாய = அடர்ந்த பவள நிறத்தின் ஒளி பாய அரிய = அருமையான பரிபுரம் ஆட = கால் சிலம்பு ஒலிக்க அயில் கரமொடு = வேல் ஏந்திய திருக் கரத்தோடு எழில் தோகை மயில் ஏறி = அழகிய கலாபம் உள்ள மயிலின் மீது ஏறி

 

அடியன் இரு வினை நீறுபட அமரர் இது புரை

அதிசயம் என அருள் பாட வரவேணும்

 

அடியன் = அடியேனுடைய இரு வினை நீறுபட = அடியேனாகிய என் இரண்டு வினைகளும் பொடிபட்டு அழிய அமரர் = (அதைக் கண்டு) தேவர்கள் இது பூரை அதிசயம் என = (இவன் ஒன்றுக்கும் உதவாதவன் கடவுள் இவனுக்கு அருள் செய்வது) என்ன ஆச்சரியம் என அருள் பாட = (உனது) திருவருளைக் கொண்டாடிப் பாட வர வேணும் = நீ எழுந்தருளி என் முன் வர வேண்டும்

 

விடை பரவி அயன் மாலொடு அமரர் முநி கணம் ஓட

மிடறு அடைய விடம் வாரி அருள் நாதன்

 

விடை பரவி = நந்தி எம்பெருமானைப் போற்றி வணங்கி அயன் மாலொடு = பிரமன், திருமாலுடன் அமரர் முநி கணம் = தேவர்களும் முனிவர் கூட்டங்களும் ஓட = ஓடி வந்து தம்மிடம் சரணம் புக மிடறு அடைய = தமது நெஞ்சிடையே பொருந்தி நிற்கும்படி விடம் வாரி அருள் நாதன் = விடத்தை வாரி உண்டு (சரணம் அடைந்தவர்களுக்கு) அருள் புரிந்த தலைவன்

 

மி(ன்)னல் அனைய இடை மாது இடம் மருவு குரு நாதன்

மிக மகிழ அநுபூதி அருள்வோனே

மி(ன்)னல் அனைய இடை மாது = மின்னல் போன்ற

இடையை உடைய பார்வதியை இடம் மருவு குரு நாதன் = (தனது) இடப்பாகத்தில் பொருந்தி உள்ள குரு மூர்த்தியாகிய சிவபெருமான் மிக மகிழ = மிகவும் மகிழ அநுபூதி அருள்வோனே = அவருக்கு ஞான உபதேசத்தை அருளியவனே

 

இடர் கலிகள் பிணி ஓட எனையும் அருள் குற மாதின்

இணை இளநீர் முலை மார்பில் அணை மார்பா

 

இடர் கலிகள் = துன்பங்களும், வறுமையும் பிணி ஓட = நோய்களும் விலக எனையும் அருள் = என்னையும் ஒரு பொருளாகக் கருதி அருளியவனே குற மாதின் = குறப் பெண் வள்ளியின் இணை இள நீர் முலை மார்பில் = இரண்டு இள நீர் போன்ற கொங்கைகள் அமைந்த மார்பில் அணை மார்பா = அணையும் மார்பனே

 

இனிய முது புலி பாதன் உடன் அரவு சதகோடி

இருடியர்கள் புகழ் ஞான பெருமாளே

 

இனிய = இன்ப நிலையில் முது புலி பாதன் உடன் = பழைய முனிவரான வியாக்ரபாதருடன் அரவு = பாம்பு உருவமுள்ள (பதஞ்சலி முனிவரும்) சத கோடி = நூறு கோடி இருடியர்கள் = முனிவர்களும் புகழ் = புகழும் ஞான பெருமாளே = ஞான மூர்த்தியாகிய பெருமாளே 

சுருக்க உரை 

ஒளி வீசும் திரு மேனியின் அழகும், முதிர்ந்த ஞான வடிவும், ஆறு திருமுகங்களும் விளங்க, பவள வாயினின்று சொல்லப்படும் வேத மொழி மணம் வீச, காலில் சிலம்புகள் ஒலிக்க, தோகை மயிலின் மீது ஏறி, அடியேனுடைய இரு

வினைகளும் பொடிபட, தேவர்கள் ஒன்றுமில்லாதவனுக்கு இறைவன் திருவருள் செய்தது ஆச்சரியம் என்று சொல்லும்படி, உன் திருவருளைக் கொண்டாட, நீ என் முன் எழுந்தருளி வரவேண்டும்

 

நந்தி பகவானை வணங்கி, பிரமன், திருமால், தேவர்கள், முனிவர் கூட்டங்கள் ஓடி வந்து சரணம் புக, நந்தி அளித்த விடையைப் பெற்று,  தம் நெஞ்சில் விடம் அடைந்து

நிற்கும்படி, அதை உண்டு, சரண் புகுந்தவர்களுக்கு அருள் புரிந்த சிவபெருமானுக்கு, அவருடைய இடப் பாகத்தில் உள்ள உமை மகிழும்படி, ஞான உபதேசத்தை அருளியவனே !  எனது துன்பங்கள், வறுமை, நோய் எல்லாம் விலக எனக்கு

அருளியவனே ! வள்ளியின் கொங்கைகளை  அணைந்தவனே ! பழைய முனிவரான வியாக்ரபாதருடன், பதஞ்சலியும் புகழ்கின்ற ஞான மூர்த்தியாகிய பெருமாளே ! என் முன்னே வர வேண்டுகிறேன்

விளக்கக் குறிப்புகள்

  பூரை = ஒன்றும் இல்லாதவன் திருமாது = பார்வதி

 முது புலிபாதரு டனரவு சத கோடி

 தில்லையில் முதலில் தவம் செய்தவர் வியாக்கிரபாதர் பின்பு தான் பதஞ்சலி வந்து   அவருடன் கூடினார்

rev 30-5-2022

பாடலை கேட்க

317.குரைகடலுலகினில்

317

வேப்பூர்

(ஆற்காட்டுக்கு அருகில் உள்ளது)

                              தனதன தனதன தனதன

                                  தாந்த தாத்தான தந்த                    தனதான

குரைகட லுலகினி லுயிர்கொடு

   போந்து கூத்தாடு கின்ற              குடில்பேணிக்

குகையிட மருவிய கருவிழி

   மாந்தர் கோட்டாலை யின்றி        யவிரோதம்

வரஇரு வினையற உணர்வொடு

   தூங்கு வார்க்கே விளங்கு                 மனுபூதி

வடிவினை யுனதழ கியதிரு

   வார்ந்த வாக்கால்மொ ழிந்த        ருளவேணும்

திரள்வரை பகமிகு குருகுல

   வேந்து தேர்ப்பாகன் மைந்தன்     மறையோடு

தெருமர நிசிசரர் மனைவியர்

   சேர்ந்து தீப்பாய இந்த்ர                                 புரிவாழ

விரிதிரை யெரியெழ முதலுற

   வாங்கு வேற்கார கந்த                 புவியேழும்

மிடிகெட விளைவன வளவயல்

   சூழ்ந்த வேப்பூர மர்ந்த                பெருமாளே

பதம் பிரித்து உரை

குரை கடல் உலகினில் உயிர் கொடு

போந்து கூத்தாடுகின்ற குடில் பேணி

குரை கடல் உலகினில் - ஆரவாரிக்கும் கடலால் சூழப்பட்ட உலகத்தில் உயிர் கொடு - உயிர் எடுத்து போந்து – வந்து  கூத்தாடுகின்ற - கூத்தாடுகின்ற குடில் பேணி - (இந்த) உடலைப் போற்றி

குகை இட(ம்) மருவிய கரு இழி

மாந்தர் கோட்டாலை இன்றி அவிரோதம்

குகை இட(ம்) மருவிய - மலைக் குகை இடம் போல உள்ள கரு - கருவில் இழி மாந்தர் - இறங்கி விடுகின்ற மனிதர்கள் கோட்டாலை இன்றி - துன்பங்கள் இல்லாமல் அவிரோதம் வர - விரோதம் இல்லாமை என்னும் உள்ளன்பு வர

வர இரு வினை அற உணர்வொடு

தூங்குவார்க்கே விளங்கும் அநுபூதி

இரு வினை அற - நல் வீனை, தீ வினை என்ற இரண்டு வினைகளும் ஒழிய உணர்வொடு - ஞான உணர்வோடு தூங்குவார்க்கே - தூங்கி விழிக்கும் அன்பர்களுக்கு விளங்கும் - விளங்கும்படியான அநுபூதி - அநுபவ ஞானம்

வடிவினை உனது அழகிய திரு

வார்ந்த வாக்கால் மொழிந்து அருள வேணும்

வடிவினை - வடிவத்தை உனது அழகிய திருவார்ந்த - உனது அழகிய லக்ஷ்மீகரம் பொருந்திய வாக்கால் - திருவாக்கால் மொழிந்து - உபதேசம் செய்து அருள வேணும் - அருள் செய்ய வேண்டும்

திரள் வரை பக மிகு குருகுல

வேந்து தேர் பாகன் மைந்தன் மறையோடு

திரள் வரை - திரண்டு பருத்த (கிரௌஞ்ச) மலை

பக - பிளவுபட மிகு குருகுல வேந்து - உயர்ந்த குருகுல அரசனாகிய (அருச்சுனனுடைய) தேர்ப் பாகன் - தேர் ஓட்டியாக விளங்கிய கண்ணனின் மைந்தன் - மகனான (பிரமன்)  மறையோடு - (தான் கற்ற) வேதமும் தானுமாய்

தெருமர நிசிசரர் மனைவியர்

சேர்ந்து தீ பாய இந்த்ர புரி வாழ

தெருமர - கலக்கம் உறவும் நிசிசரர் மனைவியர் - அசுரர்களுடைய மனைவிகள் சேர்ந்து தீப்பாய -  ஒன்று கூடி நெருப்பில் விழுந்து இறக்கவும் இந்த்ர புரி வாழ - இந்திரனுடைய பொன்னுலகம் வாழவும்

விரி திரை எரி எழ முதல் உற

வாங்கு வேல்கார கந்த புவி ஏழும்

விரி திரை - பரந்த கடலில் எரி எழ - தீ எழவும் முதல் உற -  முதன்மை தன்மை விளங்க வாங்கு - செலுத்திய வேல்கார - வேலாயுதத்தை உடைய கந்த - கந்தப் பெருமானே புவி ஏழும் - ஏழு உலகங்களின்

மிடி கெட விளைவன வள வயல்

சூழ்ந்த வேப்பூர் அமர்ந்த பெருமாளே

மிடி கெட - வறுமை நீங்கும்படி விளைவன - செழிப்பான விளைச்சலைத் தரும் வயல் சூழ்ந்த - வயல்கள் சூழ்ந்த வேப்பூர் அமர்ந்த பெருமாளே - வேப்பூரில் வீற்றிருக்கும் பெருமாளே

சுருக்க உரை

கடல் சூழ்ந்த உலகில் பிறந்து கூத்தாடுகின்ற இந்த உடலை விரும்பிப் போற்றி, கருவறையில் இfறங்கி விழுகின்ற மனிதர்களுக்கு உண்டாகும் துன்பங்கள் இல்லாமல், உள்ளன்பு நிறைந்து, வினைகள் இரண்டும் ஒழிய, நல் உணர்வோடு உறங்குபவர்களுக்கு மட்டும் உண்டாகும் ஞான அநுபவத்தை அடைய வழியை உனது திருவாக்கால் உபதேசிக்க வேண்டும்

கிரௌஞ்ச மலை பிளவுபடவும், அருச்சுனனுடைய தேர்ப்பாகனாகிய கண்ணனின் மகனான பிரமன் கலக்கம் உறவும், அசுரர்களின் மனைவிகள் தீப்புகவும், கடல் வற்றவும், செலுத்திய வேலாயுதத்தை உடையவனே செழிப்பான வேப்பூரில் வீற்றிருக்கும் பெருமாளே திருவாக்கால் உபதேசம் செய்ய வேண்டும்

விளக்கக் குறிப்புகள்

உணர்வொடு தூங்குவார்க்கே விளங்கு

தூங்கிக் கண்டார் சிவலோகமும் தம்முள்ளே

தூங்கிக் கண்டார் சிவயோகமும் தம்முள்ளே

தூங்கிக் கண்டார் சிவபோகமும் தம்முள்ளே

தூங்கிக் கண்டார் நிலைசொல்வதெவ் வாறே                    திருமந்திரம்

தூங்காமல் தூங்கிச் சுகப்பெருமான் நின்நிறைவில்

நீங்காமல் நிற்கும் நிலைபெறவும் காண்பேனோ =               தாயுமானவர்

ஆங்காரம் அற்றுஉன் அறிவுஆன அன்பருக்கே

தூங்காத தூக்கம் அது தூக்கும் பராபரமே                         தாயுமானவர் 

மறையோடு தெருமர

கஞ்சப் பிரமனை அஞ்சத் துயர்செய்து

கன்றச் சிறையிடு மயில்வீரா                        திருப்புகழ், வஞ்சத்துட

பிரமனை முனிந்து காவலிட்

டொரு நொடியில் மண்டு சூரனைப்     பொருதேறிப்.                                                                                     திருப்புகழ்,கறைபடுமுடம்பி

மேருவை நீறெ ழுப்பி நான்முக னார்ப தத்தில்

வேலடை யாள மிட்ட பெருமாளே               திருப்புகழ், தேதெனவாச